Úthlutun ársins 2025 er lokið og í ár styrkir sjóðurinn 24 skóla um sem nemur rúmum 6,7 milljónum króna. Styrkir skiptast í tvo meginflokka, annars vegar er úthlutað um 1,3 milljónum króna vegna námskeiða sem kennarar geta sótt til að efla sig í forritunarkennslu og hins vegar um 5,4 milljónum króna til kaupa á smátækjum í forritunar- og tæknikennslu auk úthlutunar á notuðum tölvubúnaði sem hollvinir FF gefa sjóðnum árlega.
Ljóst er að þörf skóla er mikil á þessu sviði því í ár var sótt um styrki sem í heild nam rúmum 18 milljónum króna og því ljóst að ekki var hægt að veita öllum styrk sem sóttu um. Þegar valið var úr umsóknum var horft til þess hvort skólar hafi sótt um og fengið styrk síðasta skólaár og var sett þak á styrkina; að hámarki var hægt að fá 200 þúsund króna styrk til að sækja námskeið í forritunarkennslu og að hámarki var hægt að fá 200 þúsund króna styrk til tækjakaupa.
Eftirtaldir 24 skólar fengu styrk í ár og óskum við þeim innilega til hamingju: Vopnafjarðarskóli, Kársnesskóli, Skarðshlíðarskóli, Breiðholtsskóli, Norðlingaskóli, Nesskóli, Vesturbæjarskóli, Lundarskóli, Grandaskóli, Fellaskóli, Fljótsdalshéraði, Njarðvíkurskóli, Vatnsendaskóli, Salaskóli, Valhúsaskóli, Mýrarhúsaskóli, Kóraskóli, Urriðaholtsskóli, Hvaleyrarskóli, Brekkubæjarskóli, Álftamýrarskóli, Víkurskóli, Álftamýrarskóli, Flóaskóli, Myllubakkaskóli
Við vonumst til að styrkurinn komi að góðum notum og styðji við hlutverk Forritara framtíðarinnar að efla forritunar- og tæknimenntun í skólum landsins.
Hollvinir sjóðsins árið 2025 eru: RB, Landsbankinn, Íslandsbanki, Marel, CCP, Arion banki, Advania og starfsfólk Bentley Systems. Þökkum kærlega fyrir stuðninginn og bendum á að nýir hollvinir eru alltaf velkomnir.
Sjóðurinn „Forritarar framtíðarinnar” er samfélagsverkefni sem hefur það hlutverk að efla forritunar- og tæknimenntun í grunn- og framhaldsskólum landsins. Um er að ræða samstarfsverkefni aðila atvinnulífsins. Framtíðarsýn sjóðsins er að auka fræðslu og áhuga á meðal barna og unglinga á forritun og tækni.
Stjórn Forritara framtíðarinnar:
Hjalti Harðarson, Landsbankinn
Klara Berta Hinriksdóttir, Advania
Hrefna Björg Gylfadóttir, Marel
Unnar Steinn Sigtryggsson, CCP
Guðrún Vala Ólafsdóttir, Kársnesskóla